Image

რუსთავში, შიდასაქალაქო ტრანსპორტის მოძრაობა 29 მაისიდან განახლდება. ამასთან დაკავშირებით, რუსთავის მერმა ირაკლი ტაბაღუამ, შიდასაქალაქო მარშრუტებზე მომუშავე კერძო სატრანსპორტო კომპანიების წარმომადგენლებთან შეხვედრა გამართა.

ირაკლი ტაბაღუამ, სატრანსპორტო კომპანიების წარმომადგენლებს, დეტალურად გააცნო ის წესები და რეკომენდაციები, რომელთა შესრულებაც, მგზავრთა გადაყვანისას სავალდებულოა. კერძოდ, როგორც ქალაქის მერმა განაცხადა, კომპანიამ უნდა უზრუნველყოს სატრანსპორტო საშუალებების ყოველდღიური დეზინფექცია და სველი წესით დამუშავება, ასევე, მძღოლების ყოველდღიური თერმოსკრინინგი, ამასთანავე, მძღოლები და მგზავრები უნდა ატარებდნენ პირბადეებს, წინააღმდეგ შემთხვევაში, ეს უკანასკნელნი მიკროავტობუსში არ უნდა დაუშვან. იკრძალება კონდიცირების სისტემის ჩართვა, ასევე, სავალდებულოა სატრანსპორტო საშუალების ღია ფანჯრებით გადაადგილება.

აღნიშნული წესების დაცვაზე მონიტორინგს, რუსთავის მერიის ტრანსპორტის მართვისა და კონტროლის განყოფილების თანამშრომლები, ასევე თავად სატრანსპორტო კომპანიების ხელმძღვანელობა განახორციელებს.

რუსთავის მერმა, სატრანსპორტო კომპანიების წარმომადგენლებს, მძღოლების ყოველდღიური თერმოსკრინინგის უზრუნველსაყოფად ელექტროთერმომეტრები გადასცა.

კერძო სატრანსპორტო კომპანიების წარმომადგენლებთან შეხვედრას, რუსთავის მერის პირველი მოადგილე ბესიკ ტოგონიძე, საზოგადოებრივი ჯანმრთელობის დაცვისა და უსაფრთხო გარემოს უზრუნველყოფის ცენტრის ხელმძღვანელი დავით ბეგაშვილი, ტრანსპორტის მართვისა და კონტროლის განყოფილების ხელმძღვანელი დავით გიორგაძე, ასევე მუნიციპალური ავტოსატრანსპორტო საწარმოს ხელმძღვანელი ჯურხა ბენდელიანი ესწრებოდნენ.

საქართველოს მთავრობის გადაწყვეტილებით, ქვეყნის მასშტაბით, მათ შორის რუსთავში შიდა საზოგადოებრივი ტრანსპორტი მუშაობას 29 მაისს განაახლებს.
ქალაქ რუსთავის მუნიციპალიტეტში, საზოგადოებრივი ტრანსპორტით მგზავრთა მომსახურება, კოვიდ-19-ის გავრცელების პრევენციის მიზნით დადგენილი ყველა წესისა და რეკომენდაციის სრული დაცვით განხორციელდება.

სამთავრობო უწყებათაშორისი საკოორდინაციო საბჭოს გადაწყვეტილებით, საქალაქთაშორისო ტრანსპორტის მოძრაობა 8 ივნისიდან აღდგება.

 

2020-05-28

ნავიგაცია