საქართველოს ადგილობრივ თვითმმართველობათა ეროვნული ასოციაციის კონკურსზე, ნომინაციაში -სკოლამდელი აღზრდა, სკოლისგარეშე განათლება და ზრდასრულთა განათლების მუნიციპალური პროგრამები, საუკეთესოდ რუსთავის სპორტის საგანმანათლებლო მუზეუმი დასახელდა.
სპეციალური ჯილდო რუსთავის მერს ნინო ლაცაბიძეს, განათლებისა და მეცნიერების მინისტრის მოადგილემ თამარ ღვამიჩავამ გადასცა.
ღონისძიებაზე ასევე დაჯილდოვდნენ მუნიციპალიტეტების მერიების ის თანამშრომლები, რომლებმაც უშუალოდ მიიღეს მონაწილეობა საკონკურსო განაცხადის შედგენაში. რუსთავის მერიიდან პრიზი ,,რუსთავის მუნიციპალური რეფორმებისა და სერვისების განვითარების ცენტრის’’ ხელმძღვანელმა მარიამ ლაცაბიძემ მიიღო.
საქართველოს ადგილობრივ თვითმმართველობათა ეროვნულმა ასოციაციამ რიგით მერვე კონფერენციაზე, საუკეთესო პრაქტიკის პროგრამის (BPP) კონკურსის 11 ნომინაციაში გამარჯვებული 13 მუნიციპალიტეტი დააჯილდოვა.
რუსთავის გარდა, სპეციალური პრიზები და სიგელები მიიღეს დუშეთის, ქუთაისის, ფოთის, თეთრიწყაროს, სენაკის, დმანისის, ხარაგაულის, ონის, ბათუმის, ბაღდათის, ხაშურისა და ზუგდიდის მუნიციპალიტეტებმა.
კონფერენციას, თბილისის მერი კახა კალაძე, რუსთავისა და გარდაბნის ისტორიული სოფლების დელეგატი საქართველოს პარლამენტში, ირაკლი შატაკიშვილი, პარლამენტის რეგიონული პოლიტიკისა და თვითმმართველობის კომიტეტის თავმჯდომარე ირაკლი ქადაგიშვილი, ცენტრალური და აღმასრულებელი ხელისუფლების, არასამთავრობო სექტორის, საერთაშორისო ორგანიზაციებისა და მუნიციპალიტეტების წარმომადგენლები ესწრებოდნენ.
კონფერენციის ფარგლებში, ხელი მოეწერა ,,ადგილობრივ ცხოვრებაში ქალთა და კაცთა თანასწორობის შესახებ’’ ევროპულ ქარტიას, რომელსაც უკვე ხელმომწერ 26 თვითმმართველობას კიდევ 4 მუნიციპალიტეტი შეუერთდა.
კონფერენციის მიმდინარეობისას, ურთიერთთანამშრომლობის მემორანდუმი გაფორმდა ათეას-სა და პარლამენტის რეგიონული პოლიტიკისა და თვითმმართველობის კომიტეტს შორის. მემორანდუმი მიზნად ისახავს მხარეებს შორის თანამშრომლობის განვითარებას დეცენტრალიზაციისა და ადგილობრივი თვითმმართველობის საკანონმდებლო მხარდაჭერის უზრუნველსაყოფად.
რუსთავის სპორტის საგანმანათლებლო მუზეუმი რამდენიმე თვის წინ გაიხსნა და სამუშაო, საექსპოზიციო, საბიბლიოთეკო და საგანმანათლებლო სივრცეებს აერთიანებს. მუზეუმს უკვე 6000-ზე მეტი ვიზიტორი ჰყავდა.