ცხელი ხაზი 1300 კონტაქტი

31 დეკემბერს, რუსთავში, თავისუფლების მოედანზე საახალწლო გალა-კონცერტი გაიმართება

31 დეკემბერს, რუსთავში, თავისუფლების მოედანზე მთავარ ნაძვის ხესთან საახალწლო გალა-კონცერტი გაიმართება.

მთავრობის ადმინისტრაციის ორგანიზებით, 31 დეკემბრის ღამეს, 10-წლიანი პაუზის შემდეგ, რუსთავი ახალი წლის დადგომას გრანდიოზული გალა-კონცერტით პირველად შეხვდება.

„ათი წლის შემდეგ, მთავარ მოედანზე რუსთაველები ყველა ერთად შევხვდებით ახალ წელს. გაიმართება სადღესასწაულო გალა-კონცერტი, ეს არის პრემიერის ძალიან დიდი საჩუქარი რუსთავისთვის. ქალაქში უკვე იგრძნობა სადღესასწაულო განწყობა. ვეპატიჟებით ყველას, 31 დეკემბერს ერთად შევხვდეთ ახალ წელს“, – განაცხადა რუსთავის მერმა ნინო ლაცაბიძემ.

რუსთავში, თავისუფლების მოედანზე უკვე დასრულდა მთავარი სცენის მოწყობის სამუშაოები.

„საშობაო ქალაქში“, რომელიც 16 დეკემბერს გაიხსნა, რუსთაველები და ქალაქის სტუმრები გემრიელი კერძებისა და გლინტვეინის დაგემოვნებას, ხელნაკეთი ნივთებისა და ადგილობრივი მეწარმეების პროდუქციის გამოფენა-გაყიდვის დათვალიერებას შეძლებენ.

ქალაქის მთავარ ნაძვის ხესთან საახალწლო გალა-კონცერტი 23:00 საათიდან დაიწყება. სადღესასწაულო კონცერტში მონაწილეობას თბილისის ოპერისა და ბალეტის ორკესტრი, ანსამბლი ,,ერისიონი”, ,,შვიდკაცა”, ლიზა ბაგრატიონი, ეკა მამალაძე, ნუკრი კაპანაძე, ქეთი გაბისიანი და სხვა ცნობილი ქართველი შემსრულებლები მიიღებენ. გალა-კონცერტს, ჯგუფ ,,რეგიონის” და ლაშა ნოზაძის კონცერტი დაასრულებს.

„გალა-კონცერტზე ყველა ჟანრის მუსიკოსები წარდგებიან მაყურებლის წინაშე. ბოლოს ჩვენც ვიქნებით – ჯგუფი ,,რეგიონი“, რომელიც აქ დაიბადა და ათი წლის შემდეგ პირველად ხვდება სახლში ახალ წელს“, – განაცხადა ლაშა ნოზაძემ.

რუსთავის მერიის გადაწყვეტილებით 31 დეკემბერს, მთელი დღის განმავლობაში საახალწლო კონცერტის დასრულებამდე, შიდასაქალაქო მარშრუტზე მუნიციპალური ტრანსპორტი მგზავრებს უფასოდ მოემსახურება. შობა-ახალი წლის საზეიმო ღონისძიებები, რუსთავში, 16 დეკემბერს, მთავარი ნაძვის ხის ანთებით დაიწყო და 7 იანვრის ჩათვლით გაგრძელდება.

წინა შპს ,,სტანდარტის” მიერ ნარჩენების აღდგენის (ნარჩენი ზეთების გადამუშავება) საწარმოო ობიექტისა და სახიფათო ნარჩენების (ნარჩენი ზეთები) დროებითი შესანახი ობიექტის მოწყობა-ექსპლუატაციის პროექტის შესახებ