რუსთავის მერმა ნინო ლაცაბიძემ და რუსთავის მაჟორიტარმა დეპუტატმა საქართველოს პარლამენტში, ირაკლი შატაკიშვილმა მერის მოადგილეებთან ერთად, მუნიციპალური სერვისების ახალ ცენტრში დასაქმებულ თანამშრომლებს საჯარო მოხელის პროფესიული დღე მიულოცეს.
,,საჯარო მოხელის პროფესიული დღე მივულოცეთ რუსთავის მერიის მუნიციპალური სერვისების ცენტრის თანამშრომლებს. ეს ცენტრი რეფორმის საფუძველზე შევქმენით. ჩვენ განსაკუთრებულ აქცენტს ვაკეთებთ იმაზე, რომ რუსთავს ერთ-ერთი გამორჩეული სერვისები ჰქონდეს და ეს ადამიანები, სწორედ ახალ, თანამედროვე და მოქალაქეებზე ორიენტირებულ სერვისებს ქმნიან“, – განაცხადა რუსთავის მერმა ნინო ლაცაბიძემ.
ნინო ლაცაბიძემ და ირაკლი შატაკიშვილმა საჯარო მოხელეებს რეფორმის ფარგლებში გაწეული სამსახურისთვის მადლობა გადაუხადეს და სიგელები გადასცეს.
,,ერთია, სახელმწიფო და მუნიციპალიტეტი რა სერვისებს სთავაზობენ მოქალაქეებს და მეორე, როგორ მიაწვდიან მათ ამ სერვისებს საჯარო მოხელეები. რუსთავი გამორჩეულია სერვისების გაუმჯობესების, რეფორმების გატარების კუთხით და ეს სწორედ თითოეული საჯარო მოხელის დამსახურებაა. ვსარგებლობ შემთხვევით და ვულოცავ თითოეულ საჯარო მოხელეს პროფესიულ დღეს“, – განაცხადა რუსთავის მაჟორიტარმა დეპუტატმა საქართველოს პარლამენტში ირაკლი შატაკიშვილმა.
მუნიციპალური სერვისების ახალი ცენტრი, რუსთავის მერიაში მიმდინარე რეფორმის ფარგლებში ჩამოყალიბდა და მიმდინარე წელს გაიხსნა. ცენტრის გახსნის შემდეგ, რუსთაველები ყველა მუნიციპალური სერვისით, ერთ კომფორტულ და თანამედროვე სივრცეში სარგებლობენ.